Carmen, unha moza madrileña de boa familia, casa por amor con don Germán, o cacique dun pobo de Estremadura, e trasládase a vivir ao interior da España máis rural e profunda. As sorpresas comezan a mesma noite de vodas, cando Carmen é brutalmente violada polo seu marido, como adianto da vida de humillación e vexacións que lle espera. Lola, a filla duns pastores, que tamén será violada ao cumprir os dezaoito anos obedecendo aos costumes da casa, foxe primeiro a un convento e despois ás misións para evitar a vergoña e maiores desgrazas; Reis, a Artistona, trianeira de beleza xitana e estrela incipiente da copla española, formada á sombra de dona Concha Piquer, é retirada do espectáculo por don Germán, quen se namora perdidamente dela e instálaa no pobo como mantida, aos ollos de todos; Bea, filla do señorito, é repudiada por ser muller e non poder transmitir os seus apelidos; Sacra, Felisa, Tecla, Amalia, a señorita Flor, son as contas dun rosario interminable, ligado á cara da vida, nun mundo de homes. No medio deste universo feminino, Xullo, o noivo da desgraciada Lola, dotado de beleza e intelixencia naturais pouco frecuentes, tramará a súa escabrosa vinganza contra don Germán a través do seu fillo Vicente, un neno enfermizo, criado entre nácar e violetas, que vive apegado ás saias da súa nai e oculta a todos a súa condición homosexual. Callejón del lobo é, ante todo, un relato de mulleres, escravas consentidas e vítimas dos homes, da súa educación e de si mesmas, nunha época que non lles dá tregua.
Ningún comentario:
Publicar un comentario